ស៊ាងហៃ៖ ក្រុមហ៊ុនបច្ចេកវិទ្យាជាង ២០០មកពី ១៥ប្រទេសជុំវិញពិភពលោក បានដាក់បង្ហាញពីផលិតផលចុងក្រោយរបស់ខ្លួន នៅក្នុងពិព័រណ៍បច្ចេកវិទ្យាអេឡិចត្រូនិចអាស៊ីមួយ ដែលហៅកាត់ថា CES Asia នៅទីក្រុងស៊ាងហៃ។ ហើយក្នុងពិព័រណ៌នោះផងដែរ រថយន្ត Audi ក៏បានលេចរូបរាងរថយន្តថ្មីមួយទៀត ម៉ូដែលរបស់ខ្លួនគឺ Audi R8 e-tron ដែលជាការបង្កើតថ្មីនូវបច្ចេកវិទ្យាទំនើបនៃប្រភេទរថយន្តអគ្គិសនី ដែលបើកបរដោយស្វ័យប្រវត្តិ ។
បណ្ដាក្រុមហ៊ុនរថយន្តប្រណីតនានា បានប្រជែងគ្នា ដើម្បីផលិតរថយន្តបើកបរដោយស្វ័យប្រវត្តិនេះ តែទោះយ៉ាងណា រថយន្ត Audi បានបង្កើតរថយន្តអគ្គិសនី (EV) គ្មានមនុស្សបើក ជាលើកទី៣ របស់ខ្លួន ដែលមានសមត្ថភាពខ្ពស់ អាចបើកបរ លើដងវិថីក្នុងល្បឿនលឿនដោយខ្លួនឯង។
ក្នុងពិពណ៌នោះផងដែររថយន្ត Audi R8 e-tron ត្រូវបានគេកត់ចូលក្នុងកំណត់ត្រាថ្មីថា ជារប្រភេទរថយន្តអគ្គិសនីដែលមានល្បឿនលឿន រហូតដល់២៥០គីឡូម៉ែត្រក្នុងមួយម៉ោង ហើយប្រើប្រាស់ម៉ាស៊ីនថាមពលអគ្គិសនីទាំងស្រុង។ យ៉ាងណាមិញរថយន្តម៉ូដែលនេះ អាចសាកថ្មពេញ បានត្រឹមតែរយៈពេល ២ម៉ោងប៉ុណ្ណោះ។
យោងតាមការចុះផ្សាយរបស់គេហទំព័រ International Business Cambodia Times ក្រៅពីបច្ចេកវិទ្យារថយន្តអគ្គិសនី ខួរក្បាល ឬក្បាលម៉ាស៊ីនរបស់ Audi ត្រូវបានបំពាក់ដោយប្រព័ន្ធសេនស័រ ព្រមទាំងវីដេអូកាមេរ៉ា តាមដានចលនារបស់រថយន្ត និងប្រព័ន្ធឡាស៊ែរ ដែលអាចបញ្ជូនទិន្នន័យទៅកាន់ខួរក្បាលរថយន្ត ដើម្បីត្រួតពិនិត្យ និងប្រមូលរូបភាពជុំវិញខ្លួន។
ដោយសម្លឹងឃើញថា ទីផ្សារដ៏ធំទូលាយនៅក្នុងប្រទេសចិន ក្រុមហ៊ុនផលិតរថយន្ត Audi របស់អាល្លឺម៉ង់ មានបំណងពង្រីកទីផ្សាររបស់ខ្លួនបន្ថែម ខណៈដែលការលក់រថយន្តម៉ាក Audi ក្នុងរយៈពេល ៤ខែដំបូងនាឆ្នាំ ២០១៥នេះ បានធ្លាក់ចុះ ៥,២ភាគរយ។
គួរបញ្ជាក់ផងដែរថា ក្នុងឆ្នាំ២០១៤ ក្រុមហ៊ុនរថយន្ត Audi នៅប្រទេសចិន បានលក់រថយន្តខ្លួនប្រមាណជិត ៥៨០,០០០គ្រឿង និងកើនឡើងស្ទើរតែ ១៨ភាគរយបើធៀបនឹងឆ្នាំ២០១៣៕
